آنـــــــــي عــــــــراقي – شلش العراقي

27.8.2006

آنـــــــــي عــــــــراقي

شلش العراقي

 

 

آني عراقي….. أي والله آني عراقي … وداعتكم يا أخوان آني عراقي.. مو لأن عندي شهادة جنسية عراقية .. ولا بسبب من كوني من أبوين عراقيين بالولادة .. لا .. آني عراقي لأن آني عراقي….. من أنام ومن اكعد ومن أكوم ومن آكل ومن اشرب ومن امشي ومن اصفن ومن أبجي ومن اضحك آني عراقي …وأي واحد يشوفني ويشوف ا…لألم والحزن والدمعة النايمة بعيني رأسا يكول هذاعراقي .. انظر اليَّ عزيزي القارئ … شوفني شلون أدخن واسمع الحسرات والآهات الصاعدة من صدري ، شوف عيوني زين .. تعال اتقرب وباوع علي .. دتشوف قهر السنوات القاسية وتعب الايام المرة ؟! .. بشرفك اكو بي شي مو عراقي …؟!

آني عراقي يعني اني مريض … مريض بكل شي اسمه عراقي .احب الكردي العراقي وأموت على التركماني العراقي وإذا يمرض المندائي العراقي آني من يمي أصخن واذا المسيحي كال الحكولي اركض ما اشوف طريقي … وإذا واحد يسألني شلش انت سني لو شيعي والله أحس كاعد يشتمني .. شنو يشتمني أحس كاعد يبوك ملامحي من وجهي واشعر بالاهانة .. وحتى نوبات بعض الأخوة القراء ما اعرف ليش يسألوني : شلش بروح أمك انت من الجماعة لو من عدنا ؟ لكم والله آني عراقي .. ليش تخلوني اصيح واطلع من طوري .. يعني لازم أصير طائفي .. لا .. لو تموتون ما اكلكم غير اني عراقي وما أصير غير عراقي ..

اني عراقي من الانبار .. صدكوني اني من الانبار ، بس ما دخلت أبيتنا مجاهدين تكفيريين ينتظرون سراهم حتى ينتحرون وسط حجياتنا وأطفالنا .. لا اني ما أسويها .. اني عراقي من الانبار بس مو بحجة المقاومة افجر الأسواق والمطاعم والكراجات والمساطر .. اني عراقي من الانبار بس ما اكطع الطريق على الناس وأكول السنة يبقون والشيعة ينزلون .. اني عراقي من ديالى صدكوني اني من ديالى ، بس ما اكطع روؤس ابناء شعبي وأحطها بصناديق الموز .. اني عراقي من ديالى ، بس ما أوجه الهاونات على الجوامع والحسينيات .. اني عراقي من ديالى بس ما اخلي غريب يدخل مدينتي ويقتل أهلي .. اني عراقي من صلاح الدين ، نعم اني من تكريت وسامرا وبيجي بس اني ما افجر محطات الكهرباء وأنابيب النفط .. اني عراقي من اربيل ، بس بغداد العزيزة تبقى عاصمتي وعلم العراق يرفرف على بيتي وما أفكر بنفسي وبس .. اني عراقي من مدينة الثورة بس ما أروح أشكل عصابات واختطف الناس واقتلهم لأسباب طائفية حقيرة .. مو صحيح حجي محمد ، مو صحيح ابو مريم ..اني عراقي من الشعلة بس ما اهجم على الغزالية واقتل الناس بدون سبب .. موصحيح سيد شناوة ، والله عيب على شرفك سيد شناوة .. اني عراقي من الدورة بس ما البس نص دشداشة و اهجر الناس للرصافة لان ذولة مومن طائفتي .. اني عراقي من البصرة ولو يجي ابو كسرى ورستم وبهشتي وبلشتي واصفهاني ويريد يدخل العشار بدون استئذان من اهل العشار والله اكسر رجله ورجل الخلّفوه .. اني عراقي من العمارة اني عراقي من الناصرية اني عراقي من الكوت من الديوانية من السماوة من الحلة اني عراقي وانت بكيفك من يا محافظة تريدني اني حاضر ..

اني عراقي واشعر بالعار لان أهلي متهجولين بالأردن وسوريا ومصر وباقي دول الجوار ..اشعر بالعار لان بناتنا وشبابنا يكسرون الخاطر بالحدود.. بناتنا الحلوات غريبات بالعواصم ويتلفتن منا ومنا .. اني عراقي واشعر بالعار لان كفاءاتنا العلمية تتوسل على وظيفة عند أتفه الناس .. اني عراقي واشعر بالعار لان حكومتي أشهر حكومة بالفساد الإداري على مستوى العالم .. اني عراقي واشعر بالعار لان مجلس النواب العراقي يتكون من وجوه أمية ومتخلفة وطائفية وعنصرية ومتخمة بالحقد على بعضها …اني عراقي واشعر بالعار من أراجع وزارة وأريد أتعين بوطني يكولولي روح جيب تأييد من حزب البلوة لو حزب فضيلة ام اللبن لو من المجلس الأعمى.. اني عراقي واشعر بالعار لان أمريكا محتلتني ودباباتها رايحة و جاية بشارع فلسطين وساحة بيروت والباب الشرجي وشارع السعدون وبكل مكان .. اني عراقي واشعر بالعار لان مصير بلدي بأيد آيات الله بطهران .. اشعر بالعار والخجل من شهداء العراق الذين سقطوا عند حدود العراق والتي أضحت بعدهم سائبة لكلاب التجسس والجريمة وتجار المخدرات ..

اني عراقي ولأنني أريد إن أبقى عراقي وأموت وأني عراقي سأشارك في الحملة الشعبية المستقلة ليوم الوحدة الوطنية ” أنا عراقي ” ليس فقط لأقول أنا عراقي بل سأتصرف منذ هذه اللحظة كعراقي .. بالمناسبة موبس اني عراقي ، انت عزيزي القاريء هم عراقي ..ولان اني عراقي وانت عراقي خل نسمع نداء الشباب الشرفاء ونصرخ وياهم بصوت واحد ” انا عراقي ”